Beno Izabako bideoa kostata baina azkenean jarri diat.
Atzerapenaren arrazoiak: arazo tekniko txiki batzuk eta denbora falta izan dira.
Jentilmen: Orrialde nagusiko “azken bideoa” atalean bideoa nola sartzen duk?
Hire esku uzten diat maniobra hori.
Beno oporrak ondo pasa eta kurtso hasieran ikusiko gaituk
Izaba: Lakartxela - Arlasbideoa

Argazkiak.org | Jakintzako mendizaleak Arlas mendirako bidean © cc-by-sa: jakinsaro

Kaixo lagunok, gaur, Santa Ana egunean , “matutina” eta Irungo bandaren diana entzun ondoren egunkaria iraurriz gosaltzen ari nahizela jada martxan dagoen Argazkiak.org proiektuaren berri izan dut . Nahi beste argazki sarean doan gorde eta partekatzen uzten digun zerbitzu euskalduna da Argazkiak.org, CodeSyntax enpresak sortutako webgunea. Oso interesantea iruditu zait eta Jakinsaroren izenean kontu bat ireki eta argazki hau igo dut probatzeko. Ez ditu Picassak eskeintzen dizkigun aukerak, baina, tira, batek daki etorkizunean noraino iritsiko den.

2007/08ko mendiko denboraldia amaitu ondoren, 2008/09koari ekin diogu eta jada, egutegia prest dugu. Iaz bezala, denetarik dugu: kosta, kobazulo, ibilbide errazak eta zailtxoagoak, aste bukaera osokoak…
Ekainean egindako asteburuko irteeraren arrakasta ikusita, berriro antolatzen saiatuko gara. Pirineotako beste bailara bisita dezakegu. Batzuk animatu gaituzue egun gehiago jartzeko, baino asteburua nahikoa dela iruditzen zaigu, gehiegi ez nekatzeko. Hurrengo urterako ordea, otsaila/martxorako plan berezi bat antolatzen ari gara urtean zehar mendi irteeratan parte hartzen dugun mendizaleontzat: eskiatzera goaz, monitoreak eta guzti! Oraindik berde xamarra dago baino horretan ari gara. Zerbait lotuta dugunean, zabalduko dugu.
Aipatu bezala, denboraldia amaitu da, eta oso urte polita izan dela esan beharra dago. Inoiz baino gehiago hartu duzue parte, giroa ezin hobea izan dugu (batez ere mahai inguruan) eta horretan jarraitzeko gogoak ikusten ditugu. Beraz, ez galdu forma gehiegi uda honetan, gero berriz hartzeko gehiago kostatzen delako.

Oharra: hiru aldiz saiatu gara Saioa mendira joaten eta hirutan eguraldia dela medio, bertan bera gelditu da. Programatik kanpo eta kotxez, irailaren 7an edo 14an joango gara. Koadrila txiki bat apuntatuta gaude baino irekita dago ere besteontzat.

Bitartean, horra hor Izabako irteeraren jasotako argazki batzuk. Ea Iurrestarazuk noiz zintzilikatzen duen bideo famatu hori.

Oporrak ondo pasa.

Joan den aste bukaeran burutu genuen hainbeste denboran zain egon garen irteera. Azken egunera iritsi arte eguraldiak nahiko kezka eragin zizkigun, baina zorionez bikain portatu zitzaigun. Larunbatean, denok igo ginen Kartxelara, batzuek erraz eta beste batzuek ez hain erraz, baina tontorrean guztien aurpegietan poza besterik ez genuen ikusi. Aurreikusia genuen bezala, igandean lortu genuen Arlas mendira igotzea. Askorentzat lehenengo 2.000koa zen eta bezperan bezalaxe gailurrera iristean berehala ahaztu zitzaizkigun igoerako nekeak.
Garaiz itzuli ginen San Martinera eta bazkaldu ondoren, Burgin, Eska ibaian bainutxo bat hartzeko astia ere izan genuen. Ondoren, etxerako bidean, Arbaiungo arroilan bisitan izan ginen.
Hiru egunetan bizi izan dugun giroa azpimarratu nahi nuke, eta ez naiz eguraldiaz ari, talde barneko harremanaz baizik. Oso momentu politak bizi izan ditugu elkarrekin eta hurrengo txangoarekin amesten hasiak gara dagoeneko.

KARTXELAKO MAPA

Hurrengo ostiralean, hilaren 13an, Barrena Kultur Etxean, bilera antolatu dugu arratsaldeko 8etan. Gai batzuk ditugu jorratzeko eta aproposa iruditu zaigu bilera antolatzea zenbait gauza adosteko.

Taldeak eginda daude, eta gelditu diren bezala banatuko ditugu. Gelditzen den astean zehar norbaitek aldaketak egin nahi baditu denbora soberan dauka egiteko. Kanpinera ailegatzen garenean dena erabat antolatuta egon behar da gauzak ez nahasteko. Asko gara eta.

Bilera ere aprobetxatuko dugu, zer eraman behar den aholkatzeko. Izan ere, batzuk etorri dira galdezka eta zerrenda prestatzen ari gara. Ezin ahaztekoa da bi egunetan mendian bertan bazkalduko dugula eta bakoitzak berea eraman behar du. Kanpinen erosteko ere aukera egongo da (ogia eta abar). Gosariak eta afariak kanpinen egingo ditugu. Lo-zakuak ez dira eraman behar denontzako izarak hartu ditugulako. Eguraldia aldakorra dagoenez, babes-arropa eramatea aholkatzen dizuegu. Ibilbidean ur gutxi aurkituko dugu, beraz kantinploraz ondo hornitu. Botak, zapatilak, txanglak, toailak,…beno bileran elkar ikusiko dugu eta denon artean zerrenda osatuko dugu.

Laburrean:

Irteera: ostiralean, 20an, arratsaldeko 6etan Arboledatik.
Buelta: igandean, 22an, gaueko 9ak aldera Arboledan.

Larunbatean Kartxela mendira joango gara egun pasa.
Igandean Arlas mendia igoko dugu. Mendi honek 2000 metro dituenez, lehenengo aldiz altuera hori lortzen duzuenok ez ahaztu txanpan botila eramatea, ohiturak agintzen duen legez.
Bi irteera horiek eguraldi ona badugu egingo ditugu, bestela alternatiba bezala, beste ibilbidea prestatu dugu: kanpin bertatik Zurizara eta hortik Linza mendi-aterpera.

Jakintza Ikastolako Mendi Taldea

Gure inguruan aukera paregabea dugu mendizaletasunaz gozatzeko. Etxe ataritik hasi ditzakegu hainbat txango, edo, ikaragarri zabal dezakegu esparrua kotxez kilometro batzuk eginez. Geroz eta jende gehiago gabiltza mendian, jaiki, Jaka aldean gosaldu, Pirinioetako tontor batera igo eta afaltzera etxera itzultzeko ere gauza gara. Erlojuaren menpe, inguruari erreparatu ere egin gabe eta diosala bat eskaintzeko denborarik ere ez duten “Abiadura Handiko Mendizaleak” geroz eta ugariagoak dira.

Gazteagoak ginela, hala moduz moldatu behar izaten genuen etxe ingurutik urruntzeko. Igande goizetan, Fray Andresen estatuaren parean, autobusa hartzen genuen Larraitzera igotzeko, eta itzultzeko berriz, ez genuen arazorik izaten, ongi funtzionatzen baitzuen hatza erakusteak. Zegamako Ortzautera trenez joaten ginen, San Adrianetik Aratz edo Aizkorrira igotzeko. Lizarrustiko Isabel bentan zenbat mus partida jokatu ote genituen La Estellesaren zain?
Gaur egun, kotxea erosoa suertatzen zaigu edozein tokira iristeko, baina, bere morroi ere bihurtzen gaitu, utzitako tokira itzultzera behartzen baikaitu. Garraio publikoa erabiltzeak ibilaldiak toki batean hasi eta beste batean bukatzeko aukera ematen digu.
Aukera honetaz baliatuz, goiz batean burutu dezakegun Lizarrustitik Amezketarainoko ibilaldia proposatu nahi dizuet. Aralarko tontor batera edo bestera igotzeko, edo, patxadan eta presarik gabe inguruaz gozatzeko aprobetxatzen baduzue, egun osora ere luzatu dezakezue.
La Estellesako autobusaz baliatuko gara Lizarrustira joateko, eta Amezketatik Alegiara edo Tolosara LURRALDEBUSeko autobusak eramango gaitu, bertatik RENFEren trenaz etxera itzultzeko. Horrela esanda, dezenteko saltsa dirudi, baina, nik azkenekoz itzuli hau egin nuenean, arratsaldeko 3:30etan etxean nengoen, lasai asko eta presarik gabe ibilita.
La Estellesa goizeko 8ak aldera Donostiatik irten eta herriz herri geldialdiak eginez, Lizarrarainoko bidea egiten du Lizarrustitik igaroz. Bada ez bada, aurretik ziurtatu ordutegiak.
Ordiziako Garagartza plazako geltokian 8:45 inguruan izango dugu eta ordu erdi bat beranduago Lizarrustiko Isabel Benta zegoen tokian utziko gaitu.

• 9:15 -0:0 - Lizarrusti- Etxarrira doan errepidea jarraitu behar dugu , garai bateko QUIFOSA fabrikaren aurriak pasatu eta 200 bat metrotara, errepidean ezkerraldean ipar aldera jotzen duen pistara iritsi arte.
• 9:30 -0:15 - Pista jarraituz fabrikaren gainetik pasako gara l eta hemendik aurrera aldapa gogortu egiten da basoan barrena altura irabaziz. Laster, Erdontzegi inguruan, mendebaldera begiratuz Aizkorri eta Aratz ikusiko ditugu eta ipar aldera Aralarko tontorrak.
• 10:15 -0:45 –Langa bat pasa ondoren pista bitan banatzen da eta eskuinekoa hartuko dugu .
• 10:30 -1:00 – Bidegurutze batera iristean ezkerreko bidea jarraitu. Putterrira igotzeko aprobetxatu nahi izanez gero, eskuineko bideak 20 bat minututan jarriko gaitu puntan eta gero Kalelantegiko lepoan Igaratzako bidearekin bat egingo dugu.
• 10:36 -1:06 – Bidearen azpialdean 30 bat metrora Etaioko iturria dago.
• 10:45 -1:15 - Kalelantegiko lepoa ( alt.1190m.) Hemen aukera polita dugu Putterriko gailurra egiteko. Ordu laurden batean igo dezakegu harri piloen arrastoa jarraituz. Lur azpiko pasabide bat ere igaro beharko dugu. Ipar-Ekialdera jarraituz laster aterako gara basotik eta aurrean azalduko zaizkigu Errenaga mendia eta Aralarko puntak; Intzako Dorrea edo Irumugarrieta , Aldaon, Pardarri, Ganboa, eta Uarrain. Lurreko arrastoak jarraituz Larretxiki eta Urrustatsoko txabola erorien arteko harratea pasatuz, Saltamuinoko lepotik Gipuzkoako lurretako basoan berriro sartuko gara.
• 11:10 -1:40 – Errenagako txabolak.(alt. 1201m.) Ermita bat eta lau aterpe daude. Hauetako bat librea da; txikia eta txukun egoten da. Aralarko Adiskideak ere badute berea eta beste biak (porlanezko eraikuntza itsusiak) gehienetan itxiak egoten dira. Iturri bat ere badago. Atsedena hartu ondoren, txaboletara datorren pista jarraituko dugu ipar aldera ordeka handi baten barrena.

• 11:25 -1:55 – Igaratza. Inguruan, megalito ugari daude eta Aralarko Adiskideak jarritako leku-adierazle bat bide erdian. Nahi izanez gero, hemendik erraz igo dezakegu Irumugarrietara, Aldaonera edo Pardarrira. Igaratzako harratea pasa ondoren, Alpetar itsura duen Arritzagako aranean sartuko gara.
  Kristo aurreko 80.000 eta 8.000 urteak bitartean iraun zuen Würm glaziar aroan, Aralarko tontorrak urte osoan elurrez estaliak zeuden. Urteak joan eta urteak etorri Aldaon (1.410 m.), Intzako Dorrea (1.430 m.), Pardarri (1.395 m.) eta Ganboko (1412 m.) magaletan pilatutako elurrek, 4 edo 5 kilometroko luzera eta 100 eta 200 metro arteko zabalera zuen glaziarra elikatzen zutela uste dute geologoek, Igaratza inguruan hasi eta ia Amezketa iritsiz. Izotzak urtu ziren, eta orain, urak, poliki-poliki arana sakontzen jarraitzen du.
• 12:30 -3:00 - Izotzak eta urak sortutakoak ez diren orbanak ere baditu Arritzagako ibarrak : XVIII. mendearen
  hasieran, Buruntzusin inguruan, gizakia mendia zulatzen hasi zen. Berrehun lagun baino gehiagok lan egiten zuten zink, berun eta batez ere kobre bila, 1904an mehatzeak itxi zituzten arte.
  1940an, alemanak, berriro martxan jarri zituzten minak eta haiek alde egin zutenean, minerala jaisteko funikularraren altzairuzko sokak, gurpilak eta makinak herdoilaren bazka bihurtu ziren eta minatako langileak erabilitako barrakoiak orain artzain txabolak dira.
  Minak atzean utziko ditugu eta berehala bidea trakestuko zaigu Aitzelo ( alt. 845 m.) parajean. Elurrak urtu edo eurite handi baten ondoren urak hazten direnean jauzi ikusgarriak sortzen ditu errekak, eta zaila egiten zaigu etxetik hain gertu gaudenik pentsatzea.
• 13:00 -3:30 – Anduitzeko borda alboan utziz, izen bereko harkaitzaren azpian pasako gara.
• 13:15 -3:45 – Beotzaa. Egurrezko zubi gainetik errekaren beste aldera pasatuz pista batekin topo egingo dugu. Hemendik aurrera pista beherantz jarraitu beharko dugu Amezketara iristeko.
  Pistak gogoko ez baditugu, zubitik berrehun bat metrotara eta bidearen eskuinean dagoen borda baten azpialdean hasten den harbide zahar bat jarraitu dezakegu. Ez dago markatuta, lokatza eta sasiren bat ere izango dugu bidean, baina senari jarraituz laster pasako gara Pernandoren jaiotetxearen ataritik, eta ordurako Amezketa begi bistan izango dugu.
• 13:45 -4:15 – Amezketa.

Ibilaldi honetaz gozatzeko aukeratu ezazue eguraldi oneko egun bat eta noski zalantzaren bat baduzue idatzi eta gustura emango dizkizuet argibideak.

Urtean zehar irteeretan parte hartu dugun batzuen artean, beste irteera bat antolatu dugu programatik kanpo. Jadanik sei kotxe bete ditugu eta ostiral honetan apuntatzeko epea itxiko dugu.
Irteera maiatzaren 18an izango da, eguraldiak laguntzen badigu. Ekainako irteera prestatzeko primerakoa.
Informazio gehiago Jentilak prestatu zuen Hurrengo Irteera ataleko estekan.

Blogean saltsan ari naizela susto eder bat izan dut. Kodigoan muturra sartu eta zati bat ezabatu dut nahi gabe, imajina ezazue ze piura gelditu zaion blogari. Ahurretik kopia bat jasoa nuen Word-en eta errekuperatu ahal izan dut galdutakoa.
Galdera: Holakotan ba al dago aurreko kodigoa berreskuratzeko beste modurik?

Izabarako irteera eguna gerturatzen ari zaigula eta, atzo, bertara inguratu ginen ibilaldiak prestatzeko, Aste Santuan baino suerte handiagoarekin, eguraldi primerakoa egin bai zigun. Kartxela mendiko bidea aztertzeko aprobetxatu genuen eta oso egokia iruditu zitzaidan ikastolako taldearekin egiteko.
Igoera aldapatsua da, baina urtean zehar gurekin etorri zaretenok ez daukazue zertan kezkatu beharrik. Konparaketa egitekotan, gure Txindokiren igoeraren antzekoa dela esango nuke. Mendiak 1.982m. ditu eta bidea 1.100 metrotara dagoen Juan Pitoko bentan hasten da pagadi eder bat zeharkatuz. Altuera hartu heinean, pinuek hartzen dute pagoen lekua eta azkenean harkaitzak eta larreak bihurtzen dira malkorren jabe. Atzo, zenbait tokitan elurra zegoen, baino, ipar aldeko aran hezeetatik eta Bardeetako ordeka lehorretatik etorriko diren artaldeek laster hartuko dute aren tokia.
Tontorretik, bistak izugarriak dira, Orhi mendia mendebaldera, Kakuetako arroila ipar aldera, Auñamendi edo Anie, Hiru Erregeen Mahia, Petrechema , Midi d’Ossau ekialdera eta Erronkariko ibarra hegoaldera.
Beraz, eguraldia lagun, ekainaren 21an Kartxelara joango gara eta berotzen hasteko hementxe dituzue bertako argazki batzuk.

Negu atipiko baten ondoren, udaberri tipiko batean murgildu gara. Mendi punta zurien eta laino beltzen gainetik, eguzki epela dugu kurika. Jertsea jantzi orduko enbarazuan; erantzi, eta beharrean, eta aterkiarekin berdin. Martxoko elur eta euriei esker, menta, goroldio eta orbel ustelaren usain heze eta gozoa zabaldu da basoan. Esnatu dira errekak, eta txorien kantuekin nahasten dira salto eta jolasean doazen uren algarak. Soroak loratu dira eta hosto berria badoa mendian gora, artzainen aurretik.
Orbel artean neguari iraun dioten ezkurrek zabaldu dituzte lehen bi adartxo hosto bakarrak, etorkizuneko itzalaren zutabe. Altsasu aldean irakaskuntzan diharduen, eta gure ekintzetako partaide den Age Maizaren eskutik ernatu den blogak ere zabal dezala bere itzala Euskararen mintegian.