Izabarako irteera eguna gerturatzen ari zaigula eta, atzo, bertara inguratu ginen ibilaldiak prestatzeko, Aste Santuan baino suerte handiagoarekin, eguraldi primerakoa egin bai zigun. Kartxela mendiko bidea aztertzeko aprobetxatu genuen eta oso egokia iruditu zitzaidan ikastolako taldearekin egiteko.
Igoera aldapatsua da, baina urtean zehar gurekin etorri zaretenok ez daukazue zertan kezkatu beharrik. Konparaketa egitekotan, gure Txindokiren igoeraren antzekoa dela esango nuke. Mendiak 1.982m. ditu eta bidea 1.100 metrotara dagoen Juan Pitoko bentan hasten da pagadi eder bat zeharkatuz. Altuera hartu heinean, pinuek hartzen dute pagoen lekua eta azkenean harkaitzak eta larreak bihurtzen dira malkorren jabe. Atzo, zenbait tokitan elurra zegoen, baino, ipar aldeko aran hezeetatik eta Bardeetako ordeka lehorretatik etorriko diren artaldeek laster hartuko dute aren tokia.
Tontorretik, bistak izugarriak dira, Orhi mendia mendebaldera, Kakuetako arroila ipar aldera, Auñamendi edo Anie, Hiru Erregeen Mahia, Petrechema , Midi d’Ossau ekialdera eta Erronkariko ibarra hegoaldera.
Beraz, eguraldia lagun, ekainaren 21an Kartxelara joango gara eta berotzen hasteko hementxe dituzue bertako argazki batzuk.
Iñaki(e)k zera dio:
Kaixo jentila!!!. Eskerrik asko informazio eta lan guzti honengatik. Esandakoaren arabera, iruditzen zait bertaratuko garenon artean egongo dela ume eta ez hain ume diren batzuk zailtasuna izango dutenak Kartxelara igotzeko. Alternatibaren bat aurkitzeko modurik ba al dago?. Nola antolatu dezakegu hau?. Animo eta segi horrela!
2 days igaro da (dira) mezua idatzi zenetik.busabiaga(e)k zera dio:
Iñakik dio, zailtasuna dela eta, ea alternatiba dagoen Mikelek egindako proposamenera. Ibilbide desberdinak antola ditzakegu baino pena litzateke hain talde polita animatu, elkartu mendi irteerak egiteko eta han taldea banatzea. Alternatibak bilatzen ari gara eguraldiaren arabera, bat edo bestea egiteko, baino hauek ere taldean egiteko. Niri, Jentilak proposatutako irteera ondo iruditzen zait. Urte asko darama saltsa honetan eta ziur egon zaitezte gora eta behera ibili dela martxa aproposa denontzat aurkitu duen arte. Berak dioen bezala “urtean zehar gurekin etorri zaretenok ez daukazue zertan kezkatu beharrik”, Eta horrela pentsatzen dut nik ere. Ez ditugu ezagutzen urtean zehar azaldu ez diren lagunak, eta hauek agian kezkatzekoak dira, baino gehienok askotan ibili gara elkarrekin eta guretzat ibilbide hau errez egiteko modukoa da. Pentsa ezazue ez dela bi edo hiru orduko martxa, baizik eta egun osokoa, eta lasai hartuta ez dugu zertan sufritu beharrik. Ez gurasook, ez haurrak. Eguna disfrutatzeko eta ondo pasatzeko ibilbidea da.
Ea ba, animo Iñaki eta gainerako guztiak, jaitsieran Juan Pito dugula zain merezitako zurrutada eskaintzeko. Gero gerokoak.
Tira!, mendira igotzea baino zailagoa zirudien blog-en parte hartzea eta begira…animatzen ari gara. Ea Iñaki bezala besteok ere animatzen garen iritziak eta proposamenak emateko. Oso ondo Iñaki.
Nik bitartean beste norabide bat hartu nuen jai egun hauetan eta argazkian azaltzen den lagun basatiarekin topo egin nuen. Polita eh?
3 days igaro da (dira) mezua idatzi zenetik.Iñaki(e)k zera dio:
Eskerrik asko azalpenengatik, dudarik ez Joan Piton zurrutada egingo dugula dena ondo joan dela ospatzeko.
4 days igaro da (dira) mezua idatzi zenetik.Hala ere Joan Pito baino lehenago zer edo zer egingo dugu, ezta?
jentila(e)k zera dio:
Azken egunetan kanpoan ibili naiz eta ez dut denborarik izan gure txoko honi kasu handirik egiteko, barkatuko didazue.
Herenegun elkarrekin egoteko aukera izan genian, Iñaki, eta badirudi Blasek eta nik emandako azalpenekin konforme gelditu haizela. Agian, gaia kanpotik jarraitu duten batzuk oraindik kezkaren bat izango dute eta beraiei ere azalpen bat zor zieat.
Aitortu beharrean nago, propio jarri nituen larunbatean ateratako argazkiak, jendea nora goazen jabetu zezan. Eta ez goaz Lazkaomendira goiza pasatzera, ikasturtean zehar, inguruko mendietan batera eta bestera oso gustura ibili garen talde baten gogoa asetzera baizik.
Jendearen aldetik, zerbait berezia egiteko nahia sumatzen genuen eta, gure kasa, berrogei edo berrogeita hamar bat pertsonentzako Pirinioetara asteburuko txango bat prestatzen hasi ginen. Zertan ari ginen zabaldu zenean, Jakintza ikastolaren Berrogeigarren urteurrena ospatzeko programaren barruan sartzea proposatu ziguten eta testuinguru hartan egin genuen deialdia. Jasotako erantzun zabalak, gure planak goitik behera aldatzera behartu gintuen. Hasierako usteak bikoiztu egin ziren eta 110 lagunentzat garraioa, ostatua eta mendi ibilaldiak antolatu beharrean jarri ginen.
Blasen lana eta denboraz ibiltzeak erabakigarriak izan dira garraioa eta ostatua lotzeko. Ibilaldiak prestatzerakoan, Iñakik bere lehenengo iruzkinean azaldutako kezka berak izan ditugu. Taldea handiagoa izateak zailtasunak sortzen ditu mendian mugitzeko eta hori gutxi balitz mendian nola moldatzen den ez dakigun jende berri asko gehitu zaigu. Nola uztartu gogoa eta kezkak?
Igande goizerako ez genuen buruhauste asko izan Arlas mendia aukeratzerakoan, oso erraza baita igotzeko. Askorentzat lehenengo 2.000koa izango da (Egoera horretan zaudetenoi gogoratu nahi dizuet, ohiturak beteranoentzat xanpaina eramatea behartzen zaituztela). Larunbaterako, berriz, Belagua eta Zurizako bailaren artean kokaturik dagoen Txamantxoia mendia aukeratu genuen, baina, Imanolek Aste Santuan bertara egindako buelta baten ondoren, ez zitzaigun egokia iruditu. “Nahiak-3 kezkak-4”.
Kartxela aproposa da elkarrekin mendiaz gozatzeko, Pirinioetako mendien “kasta” du, paisaia paregabea, eta gailurrera igotzeko lan pixka bat eskatzen duena. Zatoa estutzeko aitzakiaren bat beharko dugu, ezta? Kezkak uxatzeko, normalean hiru edo lau ordutan egiten den txangoa egiteko egun guztia izango dugula esango dizuet, eta hala ere, norbaitek ezingo balio taldeari jarraitu, bidean zain egoteko aukera izango duela , denbora osoan begi bistan izango baikaitu. Nire kezka bakarra, eguraldiarena da, txarra egiten badu ez gara igoko eta beste zerbait egin beharko dugu. Behar ezkero, autobusak eskura izango ditugu “turismoa” egiteko. Ea zortea izaten dugun, oso polita izango litzake guztiok puntaraino igotzea eta.
6 days igaro da (dira) mezua idatzi zenetik.iurresta(e)k zera dio:
Ondo aizeate!!
6 days igaro da (dira) mezua idatzi zenetik.Ni ere aspaldi honetan alfertuta nabilek, beno alfertuta baino gehiago denbora faltan.
Jentilmen: eskerraik kanpoan egon haizen, bestela…..hoi dek hoi lan ittea.
Busabiaga: Nondik atera dek argazkiko “Aker” hori? Fotoxopa??
Iñaki: Beno hi, ez beldurtu eguraldiak laguntzen badik denok gailurrera. Busabiagak eta Jentilmenek dioten bezala egun guzia zeukiau 800mt.ko desnibela igo eta jaisteko, beraz lasai ta ondo pasatzera.
eutsi goiari!!