Azkeneko hiru urteetan bezala, aurten ere elurretara joateko bidaia antolatu dugu. Denboraldiko egutegian irteera hau otsaileko 11an aurreikusi bagenuen ere, tokiaren falta dela eta, otsailaren 25era atzeratu dugu.

Irteera : otsailaren 25ean, goizeko 6etan Arboledatik.
Buelta : otsailaren 26an, iluntzean Arboledan.

Alojamendua : Jakako “Universidad de Zaragoza” aterpetxean.

Kalkulatu dugu pertsonako 90 € ordaindu behar dugula. Prezio honetan autobusa, alojamendua (biko gelak bainuarekin) pentsio erdian, bi egunetako eski alokairua*, pistarako sarrerak eta bidaia. Pentsio erdian larunbateko afaria eta igandeko gosaria sartzen dira.
Larunbata eta igandeko bazkaria pistatan egingo dugu eta bakoitzak eraman behar du.

Ordainketa egiteko:

Izena ematerakoan, eta bidaia ziurtatzeko, derrigorrezkoa da prezio osoaren erdia ordaintzea.

Gainontzeko ordainketa, bakoitzak nahi duen bezala egin dezake.

KUTXA 2101 0073 12 0012067708

Dirua sartzerakoan izen-abizenak (bakarrik izen-abizenak) jarri, mesedez.

*Eskiak alokatu behar ez dituenak 15 € gutxiago jarri behar du.

Bestalde, hemendik aurrera Jakinsaro Taldearen kronikak, albisteak, argazkiak, bideoak eta abar, http://jakinsaro.jakintza.net helbide berrian argitaratuko ditugu. Blogsome ixtera goaz (edo dagoen bezala geldituko da). Beraz, badakizue, ondo apuntatu helbide berria eta ez galdu kontaktua.

2011. urtea azkenetan dugun honetan Oñati aldean Arrikrutzeko leitzea bisitatuz bukatu dugu azken ibilaldia.

Aurretik, goizeko lehen orduetan Araotzko Orkatzategi mendiko Aitzulo ikusgarrian izan gara. Autobusetik jaitsi orduko euria izan dugu bidelagun, baina, mendian gora egin ahala elurrak ordezkatu du espero ez genuen koloreaz ingurua margotuz.
Batzuek blai eginda eta besteek hotzaz dardaraka Arrikrutzeko sarrerako atea gurutzatu dugunean, Pleistozeno garaiko lehoi eta artzen modura gustura hartu dugu lurraren epeltasuna eta babesa.

.

.

Abenduaren 18an Oñatiko Arrikrutzkto leizera goaz. Denok batera ezin izango dugu sartu eta batzuk barruan dauden bitartean besteek inguruan bueltatxo bat egingo dute.

Bisita antolatzeko lehenbailehen jakin beharra daukagu zenbat lagun joango garen, beraz, izen emateko azken eguna abenduaren 2an jarri dugu. Sarrerak 6€ balio dute eta autobusaren kostua gehituz heldu bakoitzak 9,5 € ordainduko du eta haurrek 7,5 €. Ordainketa ikastolako bulegoetan egingo da.

Bestalde, egun berean babarrun jana prestatzeko asmoa dugu elkarte batean. Izena emateko idatzi jakinsaro@gmail.com helbidera.

.

Abenduak, 18
• Irteera: 8:15etan Arboledatik
• Itzulera: 14:30etan
• Ikasleak: 7,50 €
• Helduak: 9,50 €
• Izena emateko azken eguna : Abenduak 2, ikastolan

Arritzagako meategietan izan gara gaur. Orain dela gutxi arte erreka bazterrean sakabanatuta zeuden meategietako tresnak bere garaian izan zuten erabilpena irudikatuz txukun, bilduta eta babestuta aurkitu ditugu. Horri esker, aukera izan dugu gizon haien bizimodu eta lan baldintza gogorrak imajinatzeko.
Meazulo bat jarraituz mendiaren barrenetara sartu garenean lurrak oraindik ere mineralez jositako izerdia isurtzen jarraitzen duela ikusi ahal izan dugu.

.

.

.

Azken izotz aroan Aralarko tontorretan pilatutako elurrak izotz bihurturik Arritzagatik behera ia Amezketara iristen ziren. Giroa epeltzean izotzak urtu ziren eta geroztik urak poliki-poliki jarraitzen du arana sakontzen jauzi ikusgarriak sortuz.
Meategiek utzitako orbanetatik ere ezaguna da ingurua. Brontze aroan hasi zen gizakia bertako mendiak zulatzen brontzea egiteko ezinbestekoa zuten kobrearen bila. XVIII. mendean izugarrizko garapena ezagutu zuten meategiek eta azken ahalegina alemaniarrek jarri zuten martxan, 1940. urtean, hain zuzen ere, siderita, kalkopirita, blenda eta galena ustiatuz . 25 urte geroago lanak eten ziren eta bertan jarraitzen dute minerala jaisteko funikularraren altzairuzko sokak, gurpilak eta makinak. Meategietako langileek erabilitako barrakoiak orain artzain txabolak dira.

Azaroak, 20
• Irteera: 8:15etan Arboledatik
• Itzulera: 14:00etan
• Ikasleak: 1,50 €
• Helduak: 3,50 €
• Izena emateko azken eguna : azaroak 17, ikastolan

Etxegaraten behera Sakanara sartzean jabetu gara gaur ere ezin izango genuela Beriaingo gaina zapaldu, haize bortitzek harrotutako txapel ilunak estaltzen baitzion burua.
Gailurra egiteko asmoak beste baterako utzi eta mendi dotore hau zeharkatuz Unanuatik Huarte aldera egin dugu, pago eta haritz artean negua iragartzen duen orbelak estalitako bidea urratuz.

.

.

San Donato izenarekin ezagutzen dugun Beriain mendira goaz datorren igandean.
Unanua herritik irtengo gara mendi honen tontorraren bila. Euskal Herriaren erdi erdian kokaturik zoragarriak dira bertatik ikusten diren parajeak.

Iganderako eguraldi iragarpenak oso txarrak direnez astebete atzeratu dugu irteera. Beraz Beriainera hurrengo 13an joango gara

Azaroak, 13
• Irteera: 8:15etan Arboledatik
• Itzulera: 14:00etan
• Ikasleak: 1,50 €
• Helduak: 3,50 €
• Izena emateko azken eguna : azaroak 03. ikastolan

Berandu samar, baina hemen dituzue Beizamatik Azpeitiara bitarteko bidean ateratako argazki batzuk . Gipuzkoa erdi-erdian eguraldi zoragarriaz gozatuz baserri eta baso artean egin genuen ibilaldia eta gu iritsi ginenerako, Azpeitian bete-betean ospatzen ari ziren KILOMETROAK festa.

Bestalde, datorren 23an Andoainen egingo den Finalista egunean parte hartuko dugu eta herrira itzultzen garenerako Otegieneako Nerea tabernan lagun arteko bazkaria antolatu dugu.
Joan nahi duzuenok, 16a baino lehen, jakinsaro@gmail.con helbidera mezu bat bidali beharko duzue, zenbat heldu eta zenbat haur izango zareten adieraziz.

Ohiturari jarraituz kostaldeko mendi eta labarretan hurbiltzeko asmoa genuen gaur, ikasturteko lehen ibilaldian.
Euritsu argitu zaigu eguna, ordea, eta adituek gaurko gauza onik ez zigutenez iragartzen, gertutik ibiltzea erabaki dugu, Larraiztik Ordiziara bitarteko bidea eginez.
Nahiz eta lokatza eta bustiaren ondorioz komeria batzuk izan, gustura burutu dugu ibilaldia. Horren lekuko Xuban, taldeko gaztetxoenak ea bihar mendia irekita egongo den bota digun galdera.
Hurrengoan, berriz, Beizamatik abiatuz Azpeiti aldera joko dugu bertan ospatuko den Kilometroak festan murgiltzeko. Beraz, irteera egun osorako izango da eta arratsaldeko zazpiak aldera etxera bueltatzeko asmoa dugu.
Bestalde, Kilometroak festa dela eta Goierri aldetik talde bat osatu da gune batean bazkariak emateko eta ate joka etorri zaizkigu laguntza eske jende gehiago eskatuz.
Laguntzeko prest zaudetenok jarri gutako batekin harremanetan.
Esperientziaz dakigu aukera politak izaten direla horrelakoak beste herrietako euskaltzaleekin harremanak egiteko. Ikusi bestela Herri Urrats festarako zikiroa prestatzen aritu ginen Goierritarroi iparraldeko lagunek joan den abuztuan Donaixtin eskaini zigutena.

Asteburuan Ebro eta Duero ibaien arroak banatzen dituen Iberiar Sistemako mendietan ibili gara.
Ostiral iluntzean iritsi ginen bi egunetan gure oinarrizko kanpamendua izango zen Abejar herriko “El Concurso” kanpinera. Antolaketa eredugarri bati esker dena prest zuten gu iristerako eta autobusetik jaitsi orduko afariaz gozatu ahal izan genuen.

Hurrengo egunean garaiz mugitu ginen, Castroviejoko egitura geologiko bitxiak ikusi eta gogoz abiatu ginen mendian gora pinu artean.
Duero ibaiaren iturburutik pasatuz amen batean zapaldu genuen Urbiongo gailurra. “Laguna Larga” inguruan bazkaldu, eta arratsaldeko laurak aldera iritsi ginen gure helmugara, “Laguna Negrara”. Batzuk ez zuten alferrik galdu bertan freskatu eder bat hartzeko aukera.
Kanpinera itzultzean waterpoloan eta futbolean aritzeko indarrak soberan genituen oraindik.

Igandean, berriz, Burgos probintziako Neilako urmaelen inguruetan ibili ginen. Bezperakoa baino ibilaldi motzago baten ondoren La Campiña tontorra zapaldu genuen eta uretan edo itzalean pasa genuen denbora etxera itzultzeko ordua iritsi arte.